Dingdong Dantes
សុជីអូ ដែលមានឈ្មោះពិតប្រាកដថា Jose Sixto Raphael Gonzalez Dantes III និងមានឈ្មោះពេញនិយមក្នុងពិភពសិល្បៈថា Dingdong Dantes គឺជាអ្នកដឹកនាំរឿង តារាសម្ដែង ពិធីករ និង តារាម៉ូដែល កើតនៅថ្ងៃទី ២ សីហា ឆ្នាំ ១៩៨០ នៅទីក្រុង Quezon ប្រទេស ហ្វីលីពីន។
| ឈ្មោះ | ថ្ងៃខែឆ្នាំកំណើត | ទីកន្លែងកំណើត | កម្ពស់ |
| Jose Sixto Raphael Gonzalez Dantes III | ២ សីហា ឆ្នាំ ១៩៨០ | ទីក្រុង Quezon ,ប្រទេស ហ្វីលីពីន | ១៨០សង់ទីម៉ែត្រ |
អាជីព
ឪពុករបស់ Dingdong Dantes មានឈ្មោះថា Jose Dantes, Jr. និង ម្ដាយឈ្មោះ Angeline Gonzalez Dantes ។ Dantes ចាប់ផ្ដើមអាជីពជាតារាម៉ូដែលដំបូងនៅអាយុ ២ ឆ្នាំក្នុងការផ្សាយពាណិជ្ជកម្មផលិតផលធ្វើពីទឹកដោះគោ។ បន្ទាប់មកគេក៏បានបង្ហាញខ្លួនជាតារាម៉ូដែលបានជាច្រើនកន្លែងមុនពេលរូបគេចូលក្នុងក្រុមរាំបុរសមានឈ្មោះថា Abztract Dancers ជាមួយមិត្តភក្តិរបស់គេតារាសម្ដែង Dino Guevarra និង បងប្អូនជីដូនមួយតារាសម្ដែង Arthur Solinap។ ក្រោយមកក្រុមរបស់ពួកគេក៏បានចូលរាំជាប្រចាំនៅក្នុងផលិតកម្ម Eat Bulaga! និង That’s Entertainment។
ក្នុងអាជីពជាតារាសម្ដែង Dantes បានបង្ហាញវត្តមានសម្ដែងដំបូងក្នុងខ្សែភាពយន្ត Shake, Rattle និង Roll V នៅក្នុងឈុតមួយមានចំណងជើងថា “Anino”។ ៣ ឆ្នាំក្រោយមក Dantes ក៏បានបង្ហាញខ្លួនជាលើកដំបូងពេលគេមានអាយុ ១៧ ឆ្នាំក្នុងនាមជាតួអង្គម្នាក់ប្រើឈ្មោះថា Raphael Dantes នៅក្នុងកម្មវិធីយុវវ័យ T.G.I.S. របស់ទូរទស្សន៍ GMA Network។ បន្ទាប់មក Dantes ក៏បានសម្ដែងក្នុងខ្សែភាពយន្តមួយចំនួនដូចជា Honey My Love So Sweet និង I’m Sorry My Love និង កម្មវិធីទូរទស្សន៍មួយចំនួនទៀតរួមមាន Anna Karenina និង សម្ដែងក្នុងឈុតឆាកខ្លីៗតាមរយៈការសម្ដែងតាមអត្ថបទប្រលោមលោកមនោសញ្ចេតនាយុវវ័យក្នុងឈុត F.L.A.M.E.S. ជាមួយក្រុមតារាសម្ដែងជាច្រើនរូបទៀតរបស់ប៉ុស្តិ៍ទូរទស្សន៍ ABS-CBN ដែលប៉ុស្តិ៍នេះមានការចាក់ផ្សាយចាប់ពីឆ្នាំ ១៩៩៦ ដល់ ២០០២។
២០០០- ២០០១
ក្នុងឆ្នាំ ២០០០ Dantes បានសម្ដែងក្នុងរឿងបែបកំប្លែង Super Klenk ជាមួយ តារាសម្ដែង Ara Mina។នៅឆ្នាំ ២០០១ Dantes ក៏បានសម្ដែងជាដៃគូជាមួយតារាសម្ដែង Tanya Garcia នៅក្នុងស៊េរីអូប៉េរ៉ា Sana Ay Ikaw Na Nga របស់បណ្ដាញផ្សព្វផ្សាយ GMA- 7 ។ បន្ទាប់មកដៃគូសម្ដែងទាំងពីរនាក់ក៏បានរួមគ្នាក្នុងការសម្ដែងខ្សែភាពយន្តបែបប្រលោមលោកមនោសញ្ចេតនា Twin Hearts ជាមួយគ្នាបន្តទៀតក្នុងឆ្នាំ២០០៣។ ក្រោយមក Dantes ក៏ចាប់អាជីពជាពិធីករនៅក្នុងកម្មវិធីប្រកួតប្រជែងសម្រស់មួយចំនួនដូចជា Binibining Pilipina កម្មវិធីស្វែងរកសិល្បករសិល្បការិនីមានទេពកោសល្យ StarStruck របស់ប៉ុស្តិ៍ទូរទស្សន៍ GMA Network និង កម្មវិធី Game Show ឈ្មោះថា Family Feud មុនពេលកម្មវិធីនោះដូរឈ្មោះទៅជា Edu Manzano។ ក្រៅពីអាជីពនៅលើកញ្ចក់ទូរទស្សន៍ Dantes ក៏បានបង្ហាញវត្តមាននៅក្នុងខ្សែភាពយន្តរួមមាន Magkapatid និង Pangarap Ko Ang Ibigin Ka។
២០០៧ ដល់ បច្ចុប្បន្ន
ក្នុងឆ្នាំ ២០០៧ Dantes បានសម្ដែងជាតួឯកមានឈ្មោះថា សិជីអូ (Sergio)។ ក្នុងអំឡុងពេលជាមួយគ្នានេះដែរ គេបានទទួលចំណាត់ថ្នាក់លេខ ១ ជា Bachelor of 2007 (មនុស្សកំលោះប្រចាំឆ្នាំ ២០០៧) ពីទស្សនាវដ្ដី Cosmopolitan Magazine របស់ហ្វីលីពីន។ គេក៏បានឈ្នះពានរង្វាន់ USTV Students’ Choice Award ជាតារាសម្ដែងពេញនិយមបំផុតនៅក្នុងខ្សែភាពយន្ត ឬ រឿងភាគស៊េរីខ្លីៗផងដែរ។
ក្នុងឆ្នាំ ២០០៨ Dantes បានសម្ដែងនៅក្នុងស្ទូឌីយោជាតួឈ្មោះថា Fredo មានចំណាប់អារម្មណ៍ស្នេហាជាមួយ Dyesebel។ នៅខែ មីនា ឆ្នាំ ២០០៨ គេក៏បានបង្ហាញម៉ូដជាម៉ូដែលរូបភាពឲ្យ Bench ។ នៅថ្ងៃទី ២២ សីហា ឆ្នាំ ២០០៨ Dantes ត្រូវបានគេជ្រើសរើសជាបុរសសិចស៊ីម្នាក់ក្នុងចំណោម បុរសសិចស៊ី២៥ រូបក្នុងពិភពលោក ( 25 Sexiest Men of the World) នៅ Entertainment Television ។ Dantes គឺជាតារាហ្វីលីពីនតែមួយគត់ដែលបានទទួលចំណាត់ថ្នាក់នៅក្នុងបញ្ជីឈ្មោះនេះ និង ជាតារាអាស៊ានដែលមានចំណាត់ថ្នាក់ខ្ពស់ជាងគេ(បានទទួលចំណាត់ថ្នាក់លេខ ៣) ។ នៅឆ្នាំ ២០០៨ Dantes បានសម្តែងក្នុងខ្សែភាពយន្ត One True Love និង ដើមឆ្នាំ ២០០៩ គេក៏បានសម្ដែងក្នុងខ្សែភាពយន្ត Ang Babaeng Hinugot Sa Aking Tadyang។ នៅខែសីហាឆ្នាំ ២០០៩ Dantes ត្រូវគេជ្រើសរើសជា វីជេកិត្តិយសរបស់ Myx ដើម្បីផ្សព្វផ្សាយអាល់ប៊ុមរបស់គេមានចំណងជើងថា The Dingdong Dantes Experience។ ក្រោយមកអាល់ប៊ុមនោះក៏ទទួលបានភាពពេញនិយមបន្ទាប់ពីបានចេញផ្សាយនៅក្នុង show ចម្រុះ SOP ។ បន្ទាប់ពីនេះទៀត Dantes ក៏បានសម្តែងជាតួអង្គ Cholo ក្នុងរឿងហ្វីលីពីនដែលប្រែសម្រួលចេញពីរឿងប្រលោមលោកកូរ៉េមានចំណងជើងថា Stairway To Heaven។
ចាប់ពីថ្ងៃទី ២៥ ខែមិថុនា ដល់ ថ្ងៃទី១៥ ខែ តុលា ឆ្នាំ ២០១០ Dantes បានសម្ដែងក្នុង Show ទូរទស្សន៍ Endless Love ។ ក្នុងឆ្នាំ ២០១០ នោះដែរ Dantes បានក្លាយជាសហពិធីករនៅក្នុងកម្មវិធី Party Pilipinas នៅប៉ុស្តិ៍ channel 7។ Dantes បានឈ្នះពានរង្វាន់តារាសម្ដែងឆ្នើមនៅក្នុងខ្សែភាពយន្ត Stairway To Heaven ពានរង្វាន់តារា (Star Awards) នៅក្នុងទូរទស្សន៍ និង ជាអ្នកមានឈ្មោះក្នុងពាន Asian Television Awards នៅឆ្នាំ ២០១០។
នៅឆ្នាំ ២០១១ Dantes បានសម្ដែងក្នុងស៊េរីកំប្លែងទូរទស្សន៍មានចំណងជើងថា I Heart You និង Pare! ជាមួយតារាសម្ដែងស្រី Regine Velasquez។
នៅឆ្នាំ ២០១១ ដដែល Dantes បានចុះកុងត្រាជាមួយ Star Cinema ក្នុងគោលបំណងសម្ដែងខ្សែភាពយន្ត និង ធ្វើការជាមួយ Kris Aquino។ Dantes បានសម្ដែងនៅក្នុងខ្សែភាពយន្តភាគទូរទស្សន៍ ជាមួយតួឯកស្រី និង អតីតមិត្តស្រីពិតប្រាកដរបស់គេ Marian Rivera(តួឯកស្រីឈ្មោះម៉ារីម៉ា ក្នុងខ្សែភាពយន្ត “ជីវិតនាងម៉ារីម៉ា”) ។
Marian Rivera
| ឈ្មោះ | ថ្ងៃខែឆ្នាំកំណើត | ទីកន្លែងកំណើត | កម្ពស់ |
| Marian Gracia Rivera | ១២ សីហា ឆ្នាំ ១៩៨៤ | ទីក្រុង Madrid ,ប្រទេស អេស្ប៉ាញ | ១៦៣សង់ទីម៉ែត្រ |
ម៉ារីម៉ាដែលប្រិយមិត្តបានស្គាល់តាមរយៈរឿង “ជីវិតនាងម៉ារីម៉ា” មានឈ្មោះពិតប្រាកដថា Marian Gracia Rivera( Marian Rivera ) និង កើតនៅថ្ងៃទី ១២ ខែ សីហា ឆ្នាំ ១៩៨៤។ នាងកើតនៅទីក្រុង Madrid ប្រទេសអេស្ប៉ាញ និង មានអាជីពជាតារាម៉ូដែល តារាសម្ដែង អ្នករាំ និង តារាចម្រៀង។ Rivera គឺជា Primetime Queen របស់ប៉ុស្តិ៍ទូរទស្សន៍ GMA Network ហើយនាងបានបង្ហាញវត្តមាននៅលើកញ្ចក់ទូរទស្សន៍ល្បីល្បាញរបស់ហ្វីលីពីនមួយចំនួនដូចជា Marimar, Dyesebel, Darna និង Amaya។
ក្នុងអាជីពជាតារាចម្រៀង Rivera បានចេញអាល់ប៊ុមស្ទូឌីយោចំនួន ២ ក្នុងនោះរួមមានអាល់ប៊ុមពេញនិយម Marian Rivera Dance និង Retro Crazy។ ក្រោយមកនាងបានសម្ដែងក្នុងខ្សែភាពយន្តដែលរកចំណូលបានខ្ពស់នៅក្នុង Box Office នៃប្រទេស ហ្វីលីពីន ដូចជា My Bestfriend’s Girlfriend, You To Me Are Everything និង Panday2។ ក្រៅពីច្រៀង និង សម្ដែង Rivera ក៏ជាអ្នកផ្សព្វផ្សាយពាណិជ្ជកម្មសម្រាប់ផលិតផលធំៗនៅក្នុងប្រទេសហ្វីលីពីនផងដែរ។
ប្រវត្តិរូបសង្ខេប
Marian Rivera កើតនៅទីក្រុង Madrid ប្រទេសអេស្ប៉ាញដោយមានឪពុកឈ្មោះ Francisco Javier Gracia Alonso ជាជនជាតិអេស្ប៉ាញ និង ម្ដាយ Amalia Rivera ជាជនជាតិហ្វីលីពីន។ បន្ទាប់ពីឪពុកម្ដាយរបស់នាងចែកផ្លូវគ្នា ម្ដាយរបស់នាងក៏យកនាងមករស់នៅក្នុងប្រទេសហ្វីលីពីនដែលជាកន្លែងដែលនាងធំធាត់ឡើងក្នុងជីវិតរបស់នាង។
អាជីព
វត្តមានលើកញ្ចក់ទូរទស្សន៍
Rivera ដំបូងឡើយសម្តែងអូប៉េរាសម្រាប់ទូរទស្សន៍ TAPE Inc. និង GMA Network ដោយក្នុងនោះរួមមានអូប៉េរា Kung Mamahalin Mo Lang Ako, Agawin Mo Man Ang Lahat និង Pinakammahal។ បន្ទាប់មកនាងក៏មានវត្តមានជាតួនៅក្នុងអូប៉េរា Enteng Kabisoe 2: Okay Ka Fairy Ko: The Legend Continues។ ក្រោយមកទៀត ប៉ុស្តិ៍ទូរទស្សន៍ GMA Network ក៏ឲ្យនាងសម្ដែងជាតួម្ដាយនៅក្នុងខ្សែភាពយន្តបែប ហ្វីលីពីន និង ម៉ាឡេស៊ីមានចំណងជើងថា Muli។
បន្ទាប់ពីនោះមក Rivera ក៏បានចុះកុងត្រាជាផ្លូវការជាមួយ GMA Network និង បានសម្ដែងជាតួឯកក្នុងខ្សែភាពយន្ត “ជីវិតនាងម៉ារីម៉ា(Marimar)” ដែលបានចាក់បញ្ចាំងលើកដំបូងកាលពីថ្ងៃទី ១៣ ខែសីហា ឆ្នាំ ២០០៧។ ខ្សែភាពយន្តនេះក៏បានទទួលអត្រានៃការទស្សនាខ្ពស់ជាងគេនៅក្នុងប្រទេសហ្វីលីពីនផងដែរនាពេលនោះ។
នៅឆ្នាំ ២០០៨ Rivera បានសម្ដែងជាតួអង្គក្នុងរឿង Dysebel ដែលបានចាក់បញ្ចាំងនៅថ្ងៃទី ២៨ ខែមេសាឆ្នាំ ២០០៨។ ដោយសារការបង្ហាញវត្តមានសម្ដែងនៅក្នុងខ្សែភាពយន្ត Marimar និង Dyesebel Rivera បានទទួលពានរង្វាន់ Phenomenal TV Star ពី Guillermo Mendoza Memorial Scholarship Foundation (GMMSF) នៅក្នុងកម្មវិធីប្រគល់ពានរង្វាន់ Box Office Entertainment Awards លើកទី ៣៨។
នៅដើមឆ្នាំ ២០០៩ នាងបានបង្ហាញវត្តមាននៅក្នុងភាពយន្តភាគ Ang Babaeng Hinugot Sa Aking Tadyang។ ក្រោយមកទៀត Rivera ក៏បានសម្ដែងជាតួ Darna ក្នុងភាពយន្តផលិតឡើងវិញ Superhero របស់ប៉ុស្តិ៍ទូរទស្សន៍នៅក្នុងប្រទេសហ្វីលីពីន។
នៅឆ្នាំ ២០១០ Rivera បានសម្ដែងក្នុងវណ្ណកម្មភាពយន្តថ្មីផលិតឡើងវិញយកលំនាំតាមខ្សែភាពយន្តកូរ៉េ Endless Love។ ក្នុងឆ្នាំ ២០១១ Rivera ក៏បានសម្ដែងក្នុងឈុត Amaya ឲ្យប៉ុស្តិ៍ទូរទស្សន៍ GMA Network ផងដែរ។
នៅចុងឆ្នាំ ២០១១ Rivera សហការសម្ដែងជាដៃគូម្ដងទៀតជាមួយមិត្តប្រុសពិតប្រាកដរបស់នាង Dingdong Dantes នៅក្នុងភាពយន្តភាគដែលទស្សនិកជនកំពុងទន្ទឹងរង់ចាំបំផុតមានចំណងជើងថា My Beloved របស់ប៉ុស្តិ៍ទូរទស្សន៍ GMA-7 ដែលបច្ចុប្បន្នកំពុងផលិតសម្រាប់ឆ្នាំ ២០១២នេះ។
វត្តមានមានក្នុងខ្សែភាពយន្ត
នៅឆ្នាំ ២០០៦ Rivera បានចុះកុងត្រាជាមួយ Regal Films និង សម្ដែងក្នុងខ្សែភាពយន្តភ័យរន្ធត់ព្រឺព្រួច 
Pamahiin។ មួយឆ្នាំក្រោយមក Rivera បានសហការថតនៅក្នុងពិធី Metro Manila Film Festival (MMFF)ចំនួន ២ មានចំណងជើងថា Bahay Kubo និង Desperadas។ នៅឆ្នាំ ២០០៨ Rivera បានសម្ដែងជាមួយ Richard Gutierrez នៅក្នុងខ្សែភាពយន្តមនោសញ្ចេតនាបែបកំប្លែងនៅក្នុងរឿងពេញនិយម My Best Friend’s Girlfriend។
នៅឆ្នាំ ២០១០ Rivera បានបង្ហាញវត្តមានជាមួយមិត្តប្រុស Dingdong Dantes នៅក្នុងរឿងមនោសញ្ចេតនាបែបកំប្លែងដែលធ្វើឲ្យកក្រើក Box Office មានចំណងជើងថា You to Me Are Everything ។ ហើយនៅខែធ្នូឆ្នាំ ២០១១ Rivera បានសម្ដែងជាតួឯកជា Ramon Bong Revilla Jr. ក្នុងរឿង Panday 2។
បច្ចុប្បន្ន ខ្សែភាពយន្ត “នាងមច្ឆា” ដែលសម្តែងដោយគូស្នេហ៍មួយគូនេះកំពុងចាក់បញ្ចាំងនៅលើកញ្ចក់ទូរទស្សន៍ MyTV។
No comments:
Post a Comment